【Junior.專訪】蘇樺偉與蘇媽 神奇母子高低神奇路



【體路 X Junior】香港傳奇跑手蘇樺偉雖然退役多年,但他的神奇之旅依然持續,以其故事為藍本改篇的電影《媽媽的神奇小子》(下稱《神奇小子》)好評如潮,上畫超過三個多月依然旺場,上月更獲提名代表香港競逐奧斯卡。蘇樺偉的故事從屋邨走到殘奧會,再由田徑場走到奧斯卡,兩母子直言「發夢都估唔到」,冀電影能讓大眾了解殘障運動員一路走來的奮鬥史,喚起社會對運動員及殘障人士的關注。

《神奇小子》由構思至上映,足足蘊釀七、 八年,蘇媽媽直言起初難料一套勵志電影會如此受歡迎,從未幻想電影會獲提名角逐「奧斯卡金像獎最佳國際影片」,蘇樺偉則指聞訊後非常開心,「好難先可以入圍,要有能力先可以被提名,知道一刻真係覺得冇可能嘅情況。」電影劇情勵志,兩母子砥礪前行的經歷感人真摰,蘇媽媽指自己與朋友多次入場,每次都感觸落淚,「我次次睇都從頭喊到尾,因為睇返後生都幾慘。」

樺偉雖然「輸喺起跑線」,但1996年他參與阿特蘭大殘奧會卻「贏在終點線」,與接力隊合作為港隊摘下歷史首金,電影中的主角懵懵懂懂,只顧著飲可樂和食牛扒,他笑說當屆衝線過後以為已可離場,殊不知還有下文,「隊友話要繞場一周,我問咩嚟架?100米我盡晒力跑喇,仲叫我繞場一周?好辛苦呀。」當時蘇樺偉人在外,與母親聊長途電話一幕極為催淚,蘇媽媽坦言兒子每次出外也牽腸掛肚,晚晚失眠,「當時長途電話費貴到『阿媽唔認得』,我就全靠打電話去殘奧會問情況,等佢哋話返畀我知。佢自細我就湊住佢,一要分開大家都唔慣,每逢比賽我都失眠,擔心佢瞓唔夠、輸咗又會心情唔好,呢啲心情係不由自主。」

戲中另一經典場面當數2008年北京殘奧會,蘇媽媽指當屆港隊於健全奧運未有斬獲,由於蘇樺偉以往於殘奧屢獲獎牌,出發前社會對他寄望甚殷,「香港市民好好心,行街見到會叫佢『攞金牌!為香港爭光!』,不過無形中會有啲壓力。」那年蘇樺偉先後於100米及400米跑失利,他憶述到最後一項200米賽前壓力極大,「我冇辦法放鬆,心理壓力大到係有史以來最大,我好想攞金牌,所以心情好緊張。」結果他頂住壓力再成飛人,賽前度日如年的媽媽在北京鳥巢的看台上也鬆一口氣,她透露賽後原來有段小插曲,「佢一跑完就有人畀區旗佢,但係下面有班工作人員守住,唔畀人落去,中間相隔好遠,我話『我個仔攞金牌呀!』佢又好心通融畀我過去,咁我即刻同佢影兩張相,當時個腦係興奮到一片空白。」

咁叻嘅運動員,資源幫助應該要多啲。

「神奇小子」五戰殘奧會成就斐然,然而財政一度成為蘇樺偉奔跑的攔路石,一句「我返去跑步嘅話,每個月政府津貼得3,000蚊咋」的電影對白引起網民熱話,紛紛討論殘障運動員缺乏支援的困境。蘇媽透露蘇樺偉曾考慮如電影情節般退役,幫補家計,「運動員資助唔係多,出嚟正正式式搵份工都有萬零蚊。」幸好其時歌手劉德華雪中送炭,主動邀請蘇樺偉到其歌迷會工作,蘇樺偉才得以延續運動員生涯,「我2004年奧運後見到華仔,佢問我係咪讀緊書?我話搵嘢做喇,佢話『咁不如嚟我度做,出返糧畀你』,嗰陣去比賽唔使扣假,要訓練都可以早退。」電影中蘇樺偉難以兼顧接拍廣告和訓練,蘇媽媽苦笑道,「以前邊度有咁多廣告吖,有就唔使窮啦。」她表示早年政府對運動員無甚財政支援,一家人節衣縮食支持兒子跑步,即使後來增設獎金等補助,但殘障運動員商業價值較低,與健全運動員所獲的資源相比僅杯水車薪,「我唔係話多怨言,但係咁叻嘅運動員,政府又肯定佢,資源幫助應該要多啲。」

體院主席林大輝早前受訪時指體院運動員資助有提升空間,又引例表示李慧詩如退役將有近百萬退休金,蘇媽媽慨嘆蘇樺偉「出世得早,可惜制度改革得遲」,拼搏21年換來一身傷患,雖然他已然退役,亦期望下一代運動員能更有保障,「佢付出晒青春,周身都傷患,睇醫生都係錢嚟,唔係講笑,體院以前一個月都有幾次免費按摩,但傷患係跟佢一世,其實真係應該要考慮返畀退休金運動員。」今屆奧運及殘奧會掀起「港隊熱潮」,蘇樺偉認為獎金以外,更希望大眾能持續支持港隊運動員,「每一個運動員都為香港、為自己爭光,好需要社會大眾嘅鼓勵,運動員好辛苦練習,如果有人關注,會令運動員覺得辛苦都值得。」

《媽媽的神奇小子》電影劇照

電影鏡頭後的小故事

  • 派財神

電影中蘇樺偉新年挨家挨戶派財神卻被童黨欺凌,他指當年眼見其他小孩拍門「派財神」,他便有樣學樣,而鄰居亦對他非常友善,有一戶知道他們家境平平,本來平常只派一元利是,那次卻向蘇樺偉送上十元。

  • 追火車

談起蘇樺偉與火車鬥快的故事,蘇媽媽笑說「冇拍戲咁優美」,不過兩母子以前確會街上會鬥快跑步,猛喚蘇樺偉「快啲快啲,追媽咪!」

圖:麥景智、徐嘉怡
文:洪量丰
原文刊登於Sportsroad Junior Issue#53

Sportsroad Junior

Sportsroad Junior》為全港首本月刊學界體育報,創刊號於2016年1月隆重出版,內容涵蓋全港各區學界體育賽事,現時派發據點超過全港200間中、小學。我們正陸續增加免費派發的學校數目,如學校有興趣訂閱本刊,請電郵至 [email protected],或填寫網上訂閱表格,並留下負責老師、班級數目、所需訂閱數量等資料,我們會盡快回覆及安排,謝謝你對《Sportsroad Junior》的支持。

我們目前亦設有以下公眾派發點:油麻地百老匯電影中心太子閱讀時代書店尖沙咀YMCA會員服務部修頓室內場館票務處麥花臣室內場館九龍灣Mega Ice元朗區體育會沙田體育會大埔體育會北區體育會荃灣球星羽毛球專門店,數量有限,派完即止。另外,我們亦有個人訂閱服務,詳情可按此瀏覽。

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap