【體路專欄】球員出場大過天 普巴去留會係點?



普巴直言喺曼聯日子唔開心。(Photo Credit:Pogba Twitter)

【體路專欄】曼聯中場普巴早前接受訪問公開表示:「現階段係職業生涯中最艱難嘅一段時期⋯⋯」如果提到現況艱難,我相信同佢上陣時間多與少直接掛鉤。普巴過去一直都係球隊必然正選,現階段上陣時間銳減,球員自身感覺一定唔會好受,可能會產生自我質疑,究竟自己係踢得唔夠好?定係唔能夠融入球隊體系呢?所以一向都係自信型嘅普巴今次真係面對職業生涯其中一個難關。

究竟普巴下年會唔會仲係曼聯球員?(Photo Credit:Pogba Twitter)

普巴定位在那兒 場上功能有邊啲?

我成日都會話,足球員最緊要認清自己能力,知道自己係球隊入面定位,當刻能夠為球隊作出咩貢獻。普巴過去一直擔任防守中場角色,主要負責球隊中後場組織及串連,但同時間場上缺乏紀律及執行力,周不時令球隊進退失據。自從領隊蘇斯克查傾向安排覆蓋範圍較廣及攻守具備紀律嘅麥湯文尼及費特擔任雙防中角色後,普巴場上位置隨之然改變,蘇B將佢放係鑽石型中場偏左(圖3及4)或4-2-3-1陣式嘅進攻中場(圖5)。

(圖3)
(圖4)
(圖5)

依照普巴個人能力,理論上擺喺邊個位置都無問題,論速度、耐力、個人技術、對抗性、空中爭奪等等所有要求都係屬於頂級,唯獨是腦根經常出現錯誤,永遠喺唔識當嘅時候做唔識當嘅嘢,例如喺中路過多盤扭、喜歡利用身體與對手抗衡、簡單複雜化及捨易取難(可參考下圖)等等,令壓力不停施加喺自己身上。普巴係隊中現時較有能力喺中路引球推進,甚至有較廣闊視野處理方向轉換工作,問題在於佢係咪甘心淨係專注某部份工作,而並非最搶鏡嘅一個?

球場上每個球員都有自己工作同責任,球員只需要做好本份,妥善地處理自己工作範疇,即使教練最終係咪派你出場,都可能基於種種唔同因素,可能你訓練或比賽表現不佳,可能係一種管理手法,可能佢想比其他球員出場等。所以,作為球員無時無刻都要做到最好,準備自己,控制你可以控制到嘅事情。

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap