【體路專欄】防守要集中 贏波先輕鬆



如果最後一刻鬆懈,有機會將整場比賽努力化為烏有。

【體路專欄】今個星期歐聯及歐霸賽事重新展開,意味各大球會要開始兼顧一周兩賽,各地聯賽又可能出現一啲變數。今周英超繼續上演入球Show,焦點肯定落喺默西塞特郡打吡戰雲迪克慘被踢傷及VAR推翻佐敦軒達臣入波;德甲今個星期無一支主場球隊能夠贏波;西甲皇家馬德里同巴塞隆拿相當齊心,一齊着粉紅色衫同時一齊輸波;意甲米蘭打吡戰神鋒伊巴謙莫域梅開二度,帶領AC米蘭擊敗國際米蘭!

雲迪克比賽後證實前十字韌傷勢達3級程度,或緣盡今季所有賽事。

入波只屬一瞬間 比賽結果無推翻

足球大環境主要分為進攻同防守,兩者都涉及多元化戰術,進攻方面大致上講求透過跑動、突破等行為製造進攻,球員相對地擁有較大自由度;防守方面表面球員自由度相對較低,透過磨練及配合令球隊中擁有共識,每個球員管理自己位置,處理位置上嘅責任。足球比賽周不時都會出現「絕殺」或「臨尾香」,以今個星期為例,熱刺同車路士聯賽未能把握領先優勢,最後補時階段失波痛失2分。

大部份球隊領先後都會踢得較防守性,之後令對手得到絕對優勢,輕而易舉策動進攻及射門機會,最終可能令球隊失利。球隊領先嘅情況下最需要保持戰果(Close The Game),然而,好重要嘅一個概念係「並唔等於防線可以無止境移後」!要有效地保持戰果,場上球員必須要向對手施加一定壓力,保持兩隊之間張力,除咗上述提及球員位置及責任之外,紀律及執行性同位重要。最後就係第一及第二點搶截(Second Ball),由於去到最後關頭,大家都會非常專注望住個波,往往忽略同低估咗第二或其他進攻球員,無人可以百分百估計個波第二落點位置,所以有效地覆蓋應有防守範圍,絕對係最後關頭要做好嘅地方!

熱刺第一個失波被對手直接頂入網,但此時禁區外同時響起警號。(Photo Credit: WestHam TV Channel)
第94分鐘熱刺出現第三個失波,當時禁區外空空如也,結果被遠射破網。(Photo Credit: WestHam TV Channel)
車路士最後一個失波同熱刺一樣來自自由球。(Photo Credit: Chelsea TV Channel)
車路士尾段防守自由球睇漏人情況下,禾確特半射半傳造就隊友建攻。(Photo Credit: Chelsea TV Channel)

傳奇教練摩連奴曾經講過:「一支進攻強勁球隊,可以贏到一場比賽;一支防守強勁球隊,可以贏到一個冠軍!」有時候贏波太開心的確會沖昏頭腦,去到比賽末段保持頭腦清醒非常重要。好多時候對應防守自由球,會混合區域防守(Zone Marking)及人盯人(Man Marking),球員絕對需要保持集中,清晰知道自己當下所面對嘅情況,尋找最佳解決辦法!

Share via
Copy link
Powered by Social Snap