【體路專欄】歐聯歐霸爭冠軍 終極一戰要醒神



體路專欄,足球,梁冠聰,歐聯,歐霸
拜仁慕尼黑(左上)及巴黎聖日耳門(左下)殺入歐聯決賽;歐霸決賽將由西維爾(右上)對戰國際米蘭(右下)。

【體路專欄】最近喺Netflix睇咗一套關於安歷卡嘅紀錄片(安歷卡:全是誤解),內容主要提到佢自己過去足球生涯點點滴滴,20年間面對過好多唔同挑戰。總括而言,每分每刻盡自己最大努力交出表現,控制自己可以控制地方,具備強大心理質素面對壓力!唔經唔覺今季歐聯及歐霸踢到決賽,球員生理上要對抗疲勞,心理上亦要對抗壓力,歐洲冠軍誰屬,今個星期自有分曉!

體路專欄,足球,梁冠聰,歐霸
馬天尼斯(左)及盧卡古狀態大勇,且看西維爾防線能唔能夠抵擋佢哋。(Photo Credit:Inter Milan Twitter)

國米挑戰西維爾 兩隊鬥攻無得輸

歐霸盃決賽由國際米蘭迎戰西維爾,兩隊復賽後整體表現穩定,殺入決賽非常合理。國米4強以5:0大勝蕯克達,前鋒盧卡古及馬天尼斯各自梅開二度,自2004 / 05球季阿祖安奴及馬田斯後,首次兩位前鋒單季分別攻入20球或以上。除此之外,盧卡古成為史上第1位歐霸比賽球員連續10場入波,暫時今季攻入33個入球,差1球就可以追平球會傳奇朗拿度紀錄。球隊一如以往慣用3人防線,高甸及迪維積擁有豐富經驗,維持意大利球隊防守緊密及極具紀律性特色。進攻方面,球隊除咗依靠盧卡古及馬天尼斯進行快速反擊之外,左右翼位迪岩布斯奧及艾殊利楊格經常能夠製造傳中球,所產生威力絕對不容忽視。

體路專欄,足球,梁冠聰,歐霸
西維爾隊長捷西斯拿華斯雖然年屆34歲,但場上助攻助守為球隊貢獻甚多。(Photo Credit:Sevilla Twitter)

西維爾分別喺2006、2007、2014、2015及2016年問鼎歐霸冠軍,連同今屆成為史上首支6次踢入歐霸決賽球隊,因此,大部份球迷都會叫歐霸盃為「西維爾盃」。教練盧柏迪利今季上任後大大提升球隊場上表現穩定性,球員徹底融入及適應戰術體系,場上分工清晰,清楚知道自己需要負責嘅範圍及工作,現時各項賽事20場不敗,僅次於拜仁慕尼黑(29場)。球隊進攻上甚為立體及極具侵略性,除咗左右兩翼蘇素及奧甘保斯外,左右二閘域基朗及捷西斯拿華斯經常上前參與助攻,透過中場大腦班尼加透過長傳轉方向,大多數能夠喺邊路製造人多打人少優勢。

今場比賽勝負關鍵在於兩隊邊路攻守轉換效率,以及防守中場協助兩邊防務工作效率性。國米需要防範西維爾「雙翼齊飛」踢法;西維爾需要想辦法對付盧卡古及馬天尼斯正面衝擊。

體路專欄,足球,梁冠聰,歐聯
尼馬(右)同迪馬利亞近況Fit到漏,即管睇吓佢哋決賽有冇好表現。(Photo Credit:Paris Saint-Germain Twitter)

巴黎突擊易偷雞 拜仁整體唔會曳

巴黎聖日耳門及拜仁慕尼黑將會上演歐洲王者對決,論近況兩隊不相伯仲,論實力拜仁略為秤先少少。不過,巴黎聖日耳門有效率及銳利嘅快速反擊將會成為今場贏波本錢。球會史上第1次殺入歐聯決賽,教練杜曹慣用4-3-3陣式,防線系統上泰亞高施華作為統領者,而馬昆奴斯近幾場移前出任防守中場位置,增加球隊中路攔截能力。不過,較可惜嘅係門將基羅拿華斯暫時仍然未知可唔可以趕及傷癒披甲,後備門將沙治奧域高需要隨時候命。進攻方面,尼馬、安巴比及迪馬利亞擁有好大自由度,基本上球隊冇特定中鋒,尼馬負責前場個人突破,安巴比專注以速度撕破對手防線,迪馬利亞作為中場同前線之間橋樑,為隊友鋪橋搭路。

體路專欄,足球,梁冠聰,歐聯
射手利雲度夫斯基經已連續9場歐聯有波入,如果今場梅開二度,將會追平C朗拿度歐聯單季最多入球紀錄。(Photo Credit:Bayern Twitter)

拜仁慕尼黑可以話係現時歐洲狀態最好嘅球隊,過去29場錄得28勝1和驕人成績,一共攻入97個入球,平均每場3.34球,相當之得人驚!前鋒利雲杜夫斯基連續9場歐聯有波入,追平2003年曼聯前鋒雲尼斯達萊紀錄,今屆賽事暫時以15個入球高踞射手榜。拜仁有咁多個入波皆因佢哋有好多進攻點,前場目標有利雲度夫斯基同湯馬士梅拿,左右兩翼拿比及佩利鍚習慣內切移入中路,配合左右兩閘甘美治及阿方素戴維斯後上助攻,再加上中場哥列斯卡喜歡中路直搗皇龍殺入禁區,加加埋埋有7個進攻點!不過,凡事都有辣有唔辣,太過進取令後場未必有足夠防守保護,球隊大多數將艾簡達拿、謝路美保定及艾拿巴留守後場,但若然面對巴黎聖日耳門高速反擊,恐怕未能足夠應付。

踢法機動同簡單直接,擁有高效率攻守轉換係拜仁能夠控制比賽嘅關鍵。不過,唔好忘記巴黎聖日耳門擁有高速跑車安巴比、尼馬及迪馬利亞,隨時能夠透過突擊得手。預計呢場比賽巴黎聖日耳門會以穩守突擊踢法為主,雖然拜仁會有一定主導權,但肯定唔可以好似對上幾場比賽咁空群而出,令防守遺留太多被反擊空間。

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap