【中超】陳俊樂踢足全場 富力「廣州打吡」大敗而回



【體路專訊】中超大連賽區第二輪今日(30日)上演「廣州打吡」,有港足中場陳俊樂繼續正選兼踢足全場的廣州富力以0:5不敵上屆冠軍廣州恆大,遭遇二連敗。

(廣州富力微博圖片)

 

陳俊樂在上場對深圳佳兆業首度正選並上陣78分鐘。雖然表現一般,但主帥雲邦賀斯仍繼續對「樂仔」寄予厚望,繼續安排他正選夥拍張功及比利時國腳丹比利。面對衛冕球隊恆大,富力甫開賽已受壓,僅7分鐘就被對方隊長保連奴左腳抽射破網,加上韋世豪完半場前5分鐘飛身撞入右路傳中,落後2球完半場。陳俊樂上半場續任進攻中場,但位置比上場稍為「𢭃」後,亦有一次強行突破入禁區射門省中對手。

廣州富力圖片

 

換邊後8分鐘,恆大左閘高准翼扭過唐淼後右腳勁射成3:0。唐淼8分鐘後再犯錯,禁區內以右手擋下對方傳中球,泰利斯卡操刀射入十二碼。陳俊樂於71分鐘一次入楔中意外踢到飛剷的對手,被球證出示黃牌警告。完場前,恆大的入籍中國國腳艾克森射入罰球,助球隊最終淨勝富力5球。富力下仗將於下星期三迎戰河南建業。

較早前另一場,深圳佳兆業有後備上陣的戴偉浚完場前搏得十二碼,但仍以2:3不敵上海申花。

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap