【體路專欄】海鷗兵團要護級 搓傳踢法要留神



體路專欄,足球,梁冠聰
白禮頓尋晚有後顧之憂情況下,以0:3輸俾曼聯,下場面對護級競爭對手諾域治。(Photo Credit: Brighton & Hove Albion Twitter)

【體路專欄】海鷗飛不起,總有佢道理。白禮頓今季英超表現浮浮沉沉,並唔係無原因。領隊樸達上任後積極求變,球隊比起以往更敢於喺後場透過地面組織策動進攻,不過,理想同現實往往係兩碼子嘅事,究竟係樸達希望實踐自己足球理念嚟設定球隊戰術,定係因應球員嘅能力,因人施陣嚟設定球隊戰術?絕對值得大家諗一諗。

體路專欄,足球,梁冠聰
領隊樸達必需要係實踐足球理念同爭取成績之間搵到平衡點。(Photo Credit: Brighton & Hove Albion Twitter)
陣式多變動 球員難集中

要數到白禮頓今季其中一個特點,當然係每場比賽嘅陣式都出入,甚至乎踢踢下比賽中途都會變陣。樸達要排出3人或4人防線,完全取決於佢將丹般擺喺左中堅定左後衛。陣式能夠靈活轉換本來係好事,但就算球員對唔同戰術幾熟練都好,落到場始終要因應當日自己、隊友同對手表現以至心理狀況作出調整,畢竟人唔係機械人,球隊進攻靈魂人物托沙同中場發電機梅爾較受變陣而影響佢哋發揮。托沙習慣踢左翼位置,喺左路向中間內切策動攻勢,若排出3人防線會移前踢前鋒,身型較單薄嘅佢難以抵擋後衛強大衝撞力;至於梅爾最理想係進攻中場,需要較大活動空間創造進攻機會,有時候因應陣式同戰術關係需要改踢左右翼,暴露咗佢突破能力較低及上落頻率較少嘅一面。

體路專欄,足球,梁冠聰
托沙係隊中最強突破點,佢嘅表現直接影響比賽勝負。(Photo Credit: Leandro Trossard)
球員能力要認清 場上踢法要醒定

海鷗兵團現階段比起前領隊曉頓帶領嘅時候踼得更悅目,再唔係傳統英式踢法高Q大腳,不過,好睇還好睇,實唔實際就另一個講法。後防上登克、韋士打同丹般都係用波能力較強,中前場亦有哥斯、梅爾、托沙等。然而,最大問題就係連接兩者之間嘅橋樑—防守中場!呢個位置上有史提芬斯、普柏同比素馬,如果要講到用波能力,普柏會係最好嗰個,但有留意開白禮頓比賽嘅球迷,就會知道喺呢個位置上周不時都會出事,周不時都會送下禮(可參考圖6)。因此,若然要堅持由後場組織嘅法,個人認為4-2-3-1陣式會係最啱白禮頓,每個位置亦有適合人選競爭同輪換。

單防中擺放整體效果上未如理想,一但失去控球權,中場有好多空位被反擊。
面對曼聯有限度迫搶,白禮頓難以透過搓傳組織攻勢。

.後場大意交失波或者被對方迫失,對白禮頓今季嚟講真係老是常出現。

.面對對手高強度逼搶,後防都會堅持嘗試搓返個波出嚟。

場上表現同成績反映一切,球隊季內多次轉換陣式令球員難以適應,堅定不移嘅踢法有時候令球隊吃盡苦頭,樸達真係要喺現實同夢想之間作出一定嘅取捨,水深火熱嘅情況下都要搵出最佳搶分方案。下季仲可唔可以留喺英超比賽,就好睇下一場能唔能夠擊敗護級競爭對手諾域治,拎多3分,上岸機會就大大提升。

國泰、Germagic及Canon 全力支持體路東京奧運之旅。由2019年10月至2021年8月期間,國泰、Germagic及Canon將全力支持體路直擊香港奧運運動員「Road To Tokyo」之旅,體路「Road To Tokyo」專頁現已面世,立即Click入呢度,一齊 #撐起港隊。
Share via
Copy link
Powered by Social Snap