【體路專欄】同一位置類型多 究竟你會學邊個 — 前鋒篇



體路專欄, 梁冠聰
佢哋全部都係世界級射手,你最鍾意邊個?左起:柏金、魯爾、朗拿度、亨利、雲尼斯達萊及費蘭度托利斯 (Photo Credit:Dennis Bergkamp, Raúl González Blanco, Ronaldo Nazário, Thierry Henry, Ruud Van Nistelrooy and Fernando Torres Twitter)

【體路專欄】場區球員介紹唔經唔覺嚟到最後一個位置,前鋒天職就係入波,無論一場比賽過程有幾多次機會,都要竭盡所能將個波送入網!一般而言,足球世界前鋒係最值錢,因為入波越多,贏波機會越大。所以,好多人都會爭住去踢前鋒,入波就係比賽轉捩點同關鍵點,入波可以成為全場焦點。歷代前鋒多不勝數,經典人物何其多,比利、馬勒當拿、雲巴士頓、巴治奧等等,每個球員身上都有唔同特點同長處,究竟前鋒可以有咩類型踢法?

體路專欄, 梁冠聰
哈利簡利(左)同阿古路入球能力毋庸置疑。 (Photo Credit:Harry Kane and Sergio Kun Aguero Twitter)

傳統型 — 哈利簡尼、阿古路

把握力,最能夠直接令球迷分辨係咪一個好前鋒。不過,我哋當然睇嘢唔可以咁顯淺,單憑數據或者有無入波去斷定一個球員好與壞。傳統型前鋒普偏把握力極強,有唔少球迷都會將佢哋稱為「機會主義者」、「禁區殺手」等等,用嚟比喻球員具備上乘射門觸角、技巧、技術等特質。比賽過程中,球員觸球次數較少,大部份時間留喺最前線,以至禁區入面靜靜等待入波機會,透過無球跑動(Off Ball Movement)擺脫防守球員,爭取以最短時間及最小空間起腳射門。利與弊之間,球員或多或少因為觸球時間較少,較易失去比賽集中度及狀態。

體路專欄, 梁冠聰
伊巴謙莫域(左)同夏蘭特利用龐大身軀保護個波,後衛企喺佢哋身後分分鐘波都見唔到。 (Photo Credit:Zlatan Ibrahimović and Erling Haaland Twitter)

柱躉型 — 伊巴謙莫域、夏蘭特

通常踢衛生波分隊時候,有個球員大大隻衝得撞得,但係體能同跑動力都較差,就會安排佢踢柱躉型前鋒。的而且確,柱躉型前鋒喺場上走動較少,但並不等於球員本身跑動力低,好多時候戰術上佢哋需要牽制敵方中堅球員,作為球隊前場第一傳波目標及停球點,以強大身體質素保護嗰波,爭取更多時間俾隊友上前助攻。此外,球員踢法上較為簡單直接,盡可以保護個波然後回傳俾隊友,繼而衝入禁區等待射門機會。呢類型球員大多欠缺靈活性,單對單個人能力較為輸蝕。

體路專欄, 梁冠聰
迪亞高哥斯達(左)與盧卡古同以力量見稱,周不時比賽中撞低對手。 (Photo Credit: Diego Costa and Romelu Lukaku Twitter)

力量型 — 迪亞高哥斯達、盧卡古

力量型前鋒特質上同柱躉型前鋒類近,但踢法上截然不同。球員好多時候鍾意依靠個人能力,希望以一己之力破壞防線及製造混亂,相對地同隊友配合能力較低。此外,球員最大特點係非常渴望同防守球員進行「埋身肉搏」,務求身貼身,以力量征服敵人,但每一次攞波都衝衝撞撞對球員體能消耗極大。對防守球員而言,呢類型球員非常麻煩,每一次都會死纏難打地為你製造麻煩,一不留神就有機會俾佢得逞。

體路專欄, 梁冠聰
安巴比(左)及馬斯亞同樣具備驚人速度及爆破力,經常請後衛「食塵」。 (Photo Credit:Kylian Mbappé and Anthony Martial Twitter)

突破型 — 安巴比、馬斯亞

衝呀衝,快搶攻!射呀射,射他吧!突破型前鋒擁有一定單對單盤扭能力之外,跑得快先係佢哋絕技,大多數都係由翼鋒蛻變而成。雖然名義上叫做前鋒,呢類型球員踢法上好多時候會由中路走向邊路參與進攻,絕對無既定進攻範圍,喺前場自由地走動令防守球員難於防範,但同時或會令球隊失去前場目標。除咗由中路移向邊路外,球員大部份時間希望透過「走身後」突破防線,直接與守門員形成單對單局面。球員需要洞悉場上局勢,衡量隊友係咪可以交出致命傳送,從而拿捏跑動時間。

體路專欄, 梁冠聰
費明奴(左)及基斯文經常喺比賽途中為隊友製造空位,絕對係贏波無名英雄。 (Photo Credit:Roberto Firmino and Antoine Griezmann Twitter)

掩護型 — 費明奴、基沙文

犧牲小我完成大我,利用自己無球跑動,為隊友製造進攻空間及機會,正正就係掩護型前鋒場上責任。球員大多數由敵方中堅位置墮後至中場參與策劃,因而又被稱為「偽中鋒」,兩翼球員就會利用佢遺留進攻空間進行後上入楔,球員互動及位置互換之間,往往令防守球員產生誤會,從而短時間內得到進攻優勢。此消彼長,球員「半放棄」入球機會從而令球隊進攻上有更大利益,難免入球數據較低,或因此被球迷認定係唔識入波嘅前鋒。作為球迷,我哋更加需要欣賞呢類型球員場上付出及無私奉獻!

體路專欄, 梁冠聰
C.朗拿度(左)同美斯每季都攻入幾十個入球,真係談何容易。 (Photo Credit:Cristiano Ronaldo and Leo Messi Twitter)

完美型 — C.朗拿度、美斯

2位球員係過去10年多佔據足球世界舞台,實在係我哋球迷嘅眼福,C.朗拿度同美斯對決,猶如天份對努力,不論你係支持或鍾意佢哋邊一個,兩位「入球機器」非常值得尊敬。每一集寫到完美型球員都係最困難,因為基本上要提及球員特質同踢法,都喺文章上述部份有所提及。總括而言,要成為每個位置嘅完美型,除咗能夠踢法多變,最重要係保持表現穩定性,以及場上唔同情況之下,都能夠作出最佳選擇(Decision Making)。

一連六集各個場區位置球員特性,由中堅、閘位、防守中場、進攻中場、翼鋒及前鋒,經已介紹完畢,唔知有無勾起返你嘅踢波回憶,令到你更腳痕,哈哈!疫情期間,世界恍如瞬時停頓,或者係一個喘息機會,沉澱人生重新思考。路,仍要繼續走,不過,點行點走,或者你會諗到新方向;波,仍要繼續踢,不過,點跑點踼,或者你會諗到新方向。

Share via
Copy link
Powered by Social Snap