【體路專欄】同一位置類型多 究竟你會學邊個 — 翼鋒篇



體路專欄, 梁冠聰
翼鋒類型多籮籮,你最鍾意邊一個?左起:費高、奧華馬斯、碧咸、傑斯、洛賓及史岱哲哥夫 (Photo Credit:Luís Figo, Marc Overmars, David Beckham, Ryan Giggs, Arjen Robben, Hristo Stoichkov Twitter or Instagram)

【體路專欄】人皆尋夢,夢裡不分西東。每個人都擁有自己夢想,而球場上夢想就係一Team人,不分你我一齊贏波,贏盡一切錦標。要贏波就要入波,入波除咗要有好輸送之外,亦要有良好突破點,球場上嘅突破點正正就係來自今集主角 — 翼鋒。天下唯快不破,踢得翼風通常都係隊中跑得最快,但絕對唔可以「又快又怪,帶波出界」,需要利用自己速度為球隊製造優勢。

體路專欄, 梁冠聰
丹尼爾占士(左)係曼聯今季踢防守反擊戰術重心球員;辛尼早前受到重創,今季仍然未嘗披甲。 (Photo Credit:Daniel James and Leroy Sané Twitter)

傳統型 — 丹尼爾占士、辛尼

單打獨鬥,唔使幫手,可以話係傳統型翼鋒象徵,慣用左腳球員踢左翼;慣用右腳球員踢右翼。球員場上任務主要負責喺邊路製造傳中球,姑勿論底線傳中,抑或Early Crossing,總之就要將個波由邊路放入禁區,令前鋒得到入球機會。球員特質較有紀律性,每次都會參與進攻同防守,猶如喺邊線進行來回跑,對體能付出有一定要求。其次,球員未必一定擁有最強突破能力,識得因應對手距離,喺適當時候提供高質素傳中球。不過,球員相對地同隊友配合能力較弱,喺現今足球世界較為輸蝕。

體路專欄, 梁冠聰
孫興民(左)喺英超暫停期間,回國服兵役;辛祖未來去向成為球壇焦點。 (Photo Credit:Heung-Min Son and Jadon Sancho Twitter)

突破型 — 孫興民、辛祖

話明係突破型,就梗係負責場上進行爆破任務,實行「勇」字當前!要扭波扭得頂呱呱絕對唔容易,對球員做假動作擺動、平衡性及左右腳協調要求非常高,透過身體擺動令防守球員失去平衡,繼而高速突進。喺邊路成功突破後,球隊取得人多打人少短暫優勢,讓對手中堅及防守中場球員處於尷尬位置,從而令球隊進攻上取得先機及主導權。突破型比起傳統型翼鋒較為著重突破後嘅成果,較少喺邊線製造傳中球,每次攞波擁有挑戰防守球員嘅心態,希望突破後殺入禁區,作出最危險傳送,甚至射門。

體路專欄, 梁冠聰
華舒福(左)本季表現大熟大勇,馬列斯喺曼城上陣機會不多,有傳或會離隊他投。 (Photo Credit:Marcus Rashford and Riyad Mahrez Twitter)

內切突破型 — 華舒福、馬列斯

上文提到慣用左腳球員踢左翼,慣用右腳球員踢右翼,直至荷蘭傳奇翼鋒洛賓出現,改變整個世界對翼鋒嘅思維,左腳慣用球員踢右翼,右腳慣用球員踢左翼,稱之為「逆足擺放」!內切突破型翼鋒大多數為逆足擺放,重中之中在於球員不再受到突破空間限制,較大部分時內切中路同隊友進行互動,相比起以往翼鋒單單沿邊路突破,產生更巨大威脅,產生更多樣組合變化。其次,內切後仍然能夠以慣用腳控制個波,球員除咗尋求隊友協助外,亦可以嘗試射門,爭取入球機會。進攻組合千變萬化下,作為防守球員更難估計,更難作出準繩預測。

「洛賓軌跡」並唔係浪得虛明,即使你明知佢會咁做,亦都難以阻止。(Video Credit:UEFA Youtube Channel)

體路專欄, 梁冠聰
馬達(左)同賓拿度施華都係慣用左腳球員,經常內切入中路策動攻勢。 (Photo Credit:Juan Mata García and Bernardo Silva Twitter)

內切創造型 — 馬達、賓拿度施華

時移世易,邊個會估到踢翼鋒唔需要講求突破同速度,而係需要創造性,所以大部份內切創造型翼鋒都係由進攻中場改變而成。球員起始位置喺邊路,然後嘗試內切中路,喺「旮旯位」攞波繼而發動進攻。與此同時,由邊路內切時所製造嘅邊路空間,就留俾閘位球員後上助攻,令整個攻勢處於立體狀態,防守球員只能被動地等待其後所發生嘅情況。由於球員本質傾向創造性,所擁有突破能力較一般翼鋒為低,但其優點在於可以喺前場保持控球權,為隊友爭取較多時間,出現最具威脅位置。

體路專欄, 梁冠聰
尼馬(左)同沙迪奧文尼踢法多變,令防守球員難以防範。 (Photo Credit:Neymar Jr and Sadio Mané Twitter
)

完美型 — 尼馬、沙迪奧文尼

完美型翼鋒重點在於入球產量,球員要周身刀張張利。作為翼鋒要爭取入球並唔容易,某程度上輸在起跑線,經常喺邊線出現,距離球門有一段距離。正因如此,球員更積極嘗試後上入楔突破防線,務求製造單刀情況。此外,適當時候內切同隊友做配分,令對手難以觸摸,難以預測下一步行動。當然,球員特質擁有出眾個人技術及突破能力外,有一定埋門能力之餘,亦有較廣闊視野,每次進攻情況作出最佳選擇。

天造之材,皆有其用,無論你係屬於咩類型嘅翼鋒,最重要係知道,點樣為球隊作出貢獻。翼鋒球員往往係場上焦點,球迷都會好期待究竟有咩新花式,新招數擊敗防守球員。作為翼鋒嘅你,千祈唔好怕失敗,一定要勇於嘗試突破後衛,即使唔成功都要繼續嘗試。地球係圓嘅,呢個方法唔得,就要搵第二個方法,直到搵到最佳辦法擊破當日對手。一定要記住「雙翼齊飛,入波有機」!

國泰、Germagic及Canon 全力支持體路東京奧運之旅。由2019年10月至2021年8月期間,國泰、Germagic及Canon將全力支持體路直擊香港奧運運動員「Road To Tokyo」之旅,體路「Road To Tokyo」專頁現已面世,立即Click入呢度,一齊 #撐起港隊。
Share via
Copy link
Powered by Social Snap