【體路專欄】同一位置類型多 究竟你會學邊個 — 進攻中場篇



體路專欄, 梁冠聰
他們都是近代最出色進攻中場,你最鍾意邊個?左起:P祖連奴、卡卡、朗拿甸奴、史高斯、恩尼斯達、謝拉特 (Photo Credit:Juninho Pernambucano, KaKa, Ronaldinho Gaúcho, Paul Scholes, Andreś Iniesta and Steven Gerrard Twitter)

【體路專欄】一連三星期我介紹咗中堅、左右二閘及防守中場喺球場上類別同特性,以上位置都係偏向防守,今集開始我就會講吓進攻球員。常言道,進攻就係最佳防守,進攻球員大部份時間能夠決定比賽勝負,能夠扭轉局勢,改變球賽命運。今集主角進攻中場好多時候被譽為球隊靈魂人物,即係著起10號波衫嘅球員,佢哋係球隊命脈,掌控進攻層面一切,其他周邊球員以佢為核心,聽從指令發動進攻。

創造型 — 大衛施華、奧斯爾

小朋友世界,所有事情都係美好,以為自己可以好似小鳥自由自在地翱翔,以為天馬真係可以行空。幻想同想像力的確好重要,皆因下一步就係創造,足球世界入面嘅創造,大概係指球員能夠出其不意地做出唔同基本動作,例如傳波、控波及射門,以最「估你唔到」嘅方式征服敵人。創造型進攻中場正是如此,根據個人閱讀球賽能力,喺適當時候準確地傳送,令後衛難以防範。球員特性需要非常了解自己傳波力量及質素,因應敵人位置及距離,從而判斷個波能唔能夠順利抵達目的地。睇到傳唔到,或者傳到睇唔到,真係少一樣都唔掂,而普遍創造型中場最大弱點係防守及對抗能力較低。

體路專欄, 梁冠聰
大衛施華(左)係英超過去10年交出最多球員,奧爾斯表現好壞是阿仙奴勝負關鍵。 (Photo Credit:David Silva and Mesut Özil Twitter)

突破型 — 迪巴拿、基利殊

創造型中場負責「派牌」為隊友鋪橋搭路,猶如一個輔助角色。相反,突破型進攻中場多以自我為中心,單憑一幾之力喺中路突破,從而為球隊喺進攻危險地帶製造人數優勢,甚至喺禁區附近搏得罰球。球員個性擁有較強單對單盤扭能力,經常喺敵人防守線及中場線之間遊走,務求有波到腳後轉身直接攻擊防線。不過,要成為出色突破型進攻中場關鍵在於識得「背身」踢波,攞波前要清楚四周環境,例如敵人與自己距離、可選擇傳波目標及盤扭方向。其次,球員需要具備耐性,耐心喺中堅及防守中場之間逗留,一但耐性不足墮後至中場參與組織,就不符合突破型進攻中場職責。當然,過多盤扭或會拖慢球隊進攻節奏,若球員長時間喺比賽過程中無波到腳,或會失去比賽狀態及集中力。

體路專欄, 梁冠聰
迪巴拿(左)早前確診新冠狀病毒,情況令人憂慮;基利殊本季表現出色,得到曼聯及曼城「招手」。 (Photo Credit:Paulo Dybala and Jack Grealish Twitter)

後上入楔型 — 迪利阿里、曼治

後上入楔型進攻中場又稱為偽前鋒或後上前鋒,球員場上出現位置同突破型相若,唯一最大分別係勇於向前走動,嘗試貫穿敵方防線。現代足球較為著重球員與球員之間互動及無球跑動(Off Ball Movement), 後上入楔型進攻中場大多數同前鋒進行位置互換,利用「一出一入」位置轉移令後衛及中場球員產生誤會或錯配,短時間內得到進攻優勢。球員特質需要拿捏後上入楔時機,太早或太遲會造成好大反差。此外,球員本質擁有不俗埋門能力,亦有射手觸角嘅味道。由於需要經常跑動後上入楔,若然齋跑又攞唔到波,或會令球員感到心灰意冷,放棄跑動。因此,球員過於懶惰及容易放棄,難以勝任後上入楔型進攻中場。

體路專欄, 梁冠聰
迪利阿里(左)今季在哈利簡利及孫興民受傷下肩負入球重責;曼治在林伯特麾下得到上陣機會,以卓越表現信服車路士球迷。 (Photo Credit:Dele and Mason Mount Twitter)

進攻完美型 — 迪布尼、古天奴

話明完美型,就梗係集合天下武器於一身,既能夠為隊友鋪橋搭路,亦能單憑自己能力製造入球機會。如果有睇上幾集嘅讀者,就會發現其實要成為完美型關鍵,就係決定性、穩定性及時間性。適當時候做適當工作,適當時候擔任適當角色,面對場上突如其來變化仍然能夠處變不驚,揮洒自如地表現應有水準。不論單對單個人盤扭、為隊友製造致命傳送及具備入球能力,球員本質相當全面。不過,要成為進攻中場完美型,更要符合死球專家特點,能夠為球隊處理各項死球,提供高質素傳送及入球。

體路專欄, 梁冠聰
迪布尼(左)毫無疑問是當今最佳完美型進攻中場;古天奴效力利物浦年代表現八面玲瓏,無人能擋。 (Photo Credit:Kevin De Bruyne and Philipe Coutinho Twitter)

沒有球員係完美,每個球員總會有自己強弱之處,適當地展示自己最強一面,適當地埋藏自己最弱一面,亦係一門高深學問。進攻球員比防守球員較困難重拾及保持狀態,皆因涉及較多步法移動、球感及主被動分別。場上表現總會有起有跌,即使跌低,亦要勇敢面對,盡快調整心理,迎接下一個挑戰。

國泰、Germagic及Canon 全力支持體路東京奧運之旅。由2019年10月至2021年8月期間,國泰、Germagic及Canon將全力支持體路直擊香港奧運運動員「Road To Tokyo」之旅,體路「Road To Tokyo」專頁現已面世,立即Click入呢度,一齊 #撐起港隊。
Share via
Copy link
Powered by Social Snap