【體路專欄】曼市打吡的啟示 突破能力成關鍵



【體路專訊】壓力,無處不在,同空氣一樣每個人無時無刻都會感受到。弱者,會視壓力為一個藉口,期望人哋包容係壓力下犯嘅錯;智者,會識得處理壓力,將壓力轉化成為正面能量。上周末經歷曼徹斯特打吡戰後,相信領隊蘇斯克查同哥迪奧拿各自面對唔同壓力,前者係咪能夠令球隊維持勇態至季尾;後者如何解決隊中攻同守嘅問題?

蘇斯克查(左)與哥迪奧拿由場內鬥到場外。(Source: https://twitter.com/manunitedzone_/status/1236720131667083270?s=21)
曼市打吡兩隊正選陣容(曼聯3-5-2,曼城4-3-3)

曼聯鬥心現魔性 維持穩定去爭勝

正所謂態度決定一切,紅魔鬼各項賽事近10場不敗兼8場0失球,球員場上集中度、紀律性及戰術執行係近年最佳。球隊對陣曼城時3中堅踢法非常進取(可參考圖3及4),連迪洛夫、哈利麥佳亞及梳爾近乎全場1vs1招呼對方三箭頭,左右翼位雲比沙卡及班頓威廉斯照顧對方閘位施真高及簡些路,中場上人釘人,令曼城整個上半場只得1次射門。

曼聯接近全場1vs1進行迫。(Source: 梁冠聰@NowSports)
即使阿古路墮後到中場參與組織,仍然得到哈利麥佳亞貼身「招呼」。(Source: 梁冠聰@NowSports)

下半場隨住馬列斯入替後邊路防守大受壓力,「蘇B」換入拜利將梳爾移至左翼位,配合連迪洛夫包抄頓時令活躍嘅馬列斯靜落嚟。此外,陣式上由3-5-2改為5-4-1,以制衡曼城嘗試喺邊路策動進攻,結果戰術奏效為紅魔鬼奠定勝利基礎。快速反擊毫無疑問係曼聯今季主要比賽策略,般奴費蘭迪斯加盟後令反擊更具威脅,適當時候控制比賽節奏,透過保持控球在腳及轉換方向,爭取更多時間比隊友上前進攻。球員場上表現反映蘇B為紅魔鬼帶嚟正確將來,且看能否保持整體穩定性,爭取更好成績。

般奴費蘭迪斯加盟後令馬斯亞在前場得到唔少埋門機會。(Source: Bruno Fernandes’s Twitter)

攻守郊率齊下降 缺少突破心慌慌

曼城今場比賽依舊排出4-3-3陣式,較令人感到疑惑嘅係哥迪奧拿安排霍頓踢右翼鋒,而賓拿度施華出任靠右進攻中場,我認為將兩人對調會有更理想效果。基於球隊整體戰術體系非常倚靠邊路突破,左翼鋒史端寧無法突破雲比沙卡情況下,藍月亮上半場毫無攻勢。直至下半場馬列斯入替後,曾帶嚟一定威脅但可惜無法轉化成為入球。

辛尼去年8月受重創後,早前已於預備早上陣,曼城球迷們掛唔掛住佢嘅邊線突破呢?(Source: Leroy Sane’s Twitter)

後防中堅位置上別無他選,奧達文迪及費蘭甸奴同樣速度較慢,此消彼長下令馬斯亞及丹尼爾占士速度優勢更加顯著。再者,當曼城嘗試在後場組織時,左閘施真高會移上中路防守位置(參考圖7及8),左中場根度簡則利用佢製造空間進行後場串連,不過整體效果實屬一般,不但唔能夠提高組織成功,反而喺互換位置期間,一但失去控球權會遺留更大被進攻空間。

曼城嘗試在後場組織時,施真高已經移到防守中場位置(Source: 梁冠聰@NowSports)
然而,根度簡會利用佢製造及遺留嘅空間(Source: 梁冠聰@NowSports)

一場曼市打吡再次引證突破型球員能夠主宰球賽命運,只要能夠成功突破敵人,就可以製造人數優勢尋求入波機會。曼聯陣容仍然年輕,有好大進步空間,首要目標提升場上表現穩定性;曼城正面臨改朝換代,今季有甘賓尼離開,下季有大衛施華,睇嚟哥帥都要諗下計仔。

國泰、Germagic及Canon 全力支持體路東京奧運之旅。由2019年10月至2021年8月期間,國泰、Germagic及Canon將全力支持體路直擊香港奧運運動員「Road To Tokyo」之旅,體路「Road To Tokyo」專頁現已面世,立即Click入呢度,一齊 #撐起港隊。
Share via
Copy link
Powered by Social Snap