20140621-jerryliu01

【體路專欄】今日講嘅呢個話題我真係覺得長講長有…….

依家好多朋友(尤其係女性)一見到我都離不開問點減肥,跟住我都係一如以往咁答需要做返啲帶氧運動同做返啲exercise咁啦…我都未講完佢地就會好大反應……

而大部份嘅答案都係:
1)嘩!跑步小腿會粗架,我之前跑過一排(其實係幾日)隻小腿就咁粗喇…
2)而有一部份一聽到話做gym就會同我講:咦~我唔想練到啲肌肉一舊舊呀!!

以上兩個可以話係大部份人嘅標準答案,其實有好多人都係對「做gym」呢個字有誤解
如果你話跑步做gym會令到有一舊舊肌肉嘅話,不如我地從另一個角度睇吓,假如我同你講有肌肉可以令你睇落去個人firm啲、線條好睇啲、皮膚滑啲、減肥快見效啲,你又會唔會想要啲肌肉呢?定係你仲係要果啲鬆泡泡嘅肉呢??

好多人一聽到做gym就會諗起大大舊嘅肌肉,但係係做訓練裡都分好幾個範疇,例如有訓練肌力、肌耐力、肌肉生長等。

人人訓練目標唔同,唔係個個都想練大舊嘅呢,之前都有提及過女性嘅荷爾蒙所限,無咁容易有肌肉,除非你打咗荷爾蒙、又或者星期一至六每日舉好重嘅嘢舉足大半日啦,如果你哋嘅身體構造係舉幾吓啞鈴就有一舊舊嘅肌肉又好耐好耐都唔鬆嘅話,我真係要恭喜你,因為好多男仔做gym都係想大隻,但練來練去飲埋奶粉都練唔到大隻,你舉幾吓啞鈴就話有老鼠仔,真係羨慕死佢地,我地嘅肌肉每日不停流失,跑幾次就話小腿變粗咗嘅話就真係要去check check佢先得。

(網上圖片)

很多外國的”female fitness model”,都有做帶氧同重訓。(網上圖片)

如果仲係驚有肌肉唔好睇嘅話,大家不如上網睇吓好多外國嘅”female fitness model”,佢地都有做帶氧同重訓,細心欣賞一吓佢地身體嘅線條,如果大家都仲係覺得跑步變象腿的話有可以上網search吓台灣靚女”歐陽靖”,人地10k、10k咁跑架。

減肥一定離不開做運動,只要訓練得宜一定可以令你地嘅身形比起節食來得好睇呢!!

Comments