The Chosen One



圖: 曼聯FACEBOOK
圖: 曼聯FACEBOOK

【體路專欄】可能咀咒得人多,富足主呢排健康麻麻,差唔多病足半個月,波都練唔到,o黎緊記協盃睇怕又畀揸住雞毛o既國足主罰坐冷板。

雖然富足主病到返唔到工,但唔代表唔留意世界球壇消息。呢排最多人談論o既,應該都係莫耶斯被炒o既新聞。認識富足主o既朋友,都知道我係反曼躉,o係呢度要澄清一點,其實富足主反曼,好大程度係唔妥班曼迷,尤其係莫耶斯被炒之後,部分曼迷副咀臉就更加乞人爭。

大家都記得上季當費爵爺退休,點名由莫耶斯接手之後,曼迷仲好鬼開心,睇好呢位The Chosen One可以做好繼承人呢個位。不過正如o係大部分人心目中一樣,班曼迷都係Glory Hunter,只要交唔出成績,就可以打倒昨日的我,甚至唔使再尊重呢位The Chosen One。見到左倫右李知道莫帥被炒之後開心到影哂相,就大慨知道呢o的曼迷心態係點。

富足主有唔少網上朋友都係曼聯FANS,當中有o的比較偏激,話一支強隊(?)當然要睇成績做人,成績唔好就要走。富足主見到差o的笑出聲,好心你睇下自己隊波咩料先啦,講真曼聯今季人腳,就算畀老費出山又點?可以拎冠軍定上前4?況且睇下o個o的高薪續約o既所謂主力,踢到一無是處,班曼迷可以選擇性失明,真係唔多公道。

兜o左咁大個圈,以夏體硬為例丫,雖則國足主佢成日亂點鴛鴦,出埋o的後衛又8+1斬,搞到隊波表現麻麻,但如果唔係多得佢多年來o既栽培,球隊上屆都唔可能開花結果,唔通你話如果今年贏唔到冠軍就郁佢?富足主就有保留囉,話哂佢都係我o地o既The Chosen One,點都要撐落去o架。

打到呢度,富足主夠鐘食藥喇,再談。

image_pdf
image_print
Share via
Copy link
Powered by Social Snap