夏體硬足球隊專欄:免費送出記協盃決賽入場券



記協盃決賽仲有半個月先舉行,今期不如同大家講下本地波。近期本地球圈接二連三發生o左好多事,雖然同夏體硬無直接關係,但係都好值得以引以為鑑。

首先就係「$500港隊」獎金事件,港隊o係亞洲盃外圍賽爆冷逼和烏茲別克,作為足總高層就好應該獎勵一下,呢o的基本上唔使人教,唔係以後仲使旨意有人同你搏命咩。點知呢個足總真係以為唔做唔錯,結果搞到班港腳躁o左。

另外,上個星期就係傑志對曼聯場表演賽公開賣飛o既大日子,結果幾個鐘就賣哂18000張飛。對於有人批評主辦單位收起哂o的靚位,副足主真係無言。Ken哥其實都講得好o岩,大家買飛前都睇到個座位圖,唔o岩o既咪唔好買囉,又要睇又要嘈,真係香港人特色。

好在,以上兩單新聞,一定唔會o係夏體硬出現。o係贊助商支持之下,夏體硬球員福利可以話係冠絕同儕,我o地打完波唔理輸贏,都肯定會有餐飯食,過時過節仲會有大利是,裝備就更加係源源不絕咁供應,試問仲邊會有怨言?

至於話想入場睇我o地打波呢,就梗係無任歡迎添啦。副足主同足主研究之後,決定3月16日o既記協盃決賽,免費送出所有入場券,仲保證靚位。各位球迷當日只要對住我o地大嗌「支持夏體硬」,就可以唔使錢入場為我o地打氣,如果加多句「我愛可樂暉」呢,就更加可以同可樂暉共進午餐,名額不限。機會難逢,各位可粉到時見啦!(想有下文的話就請私底下同可樂暉聯絡,謝謝)

富足主

logo-dlm-small

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap