【體路專訊】菁英盃週六下午在旺角大球場上演四強戰,由佳聯元朗與香港飛馬合演激戰,終場元朗憑兩球十二碼和法比奧的入球奠勝,以3:2擊敗香港飛馬,率先晉級決賽。

開賽初段香港飛馬已經有正選門將梁興傑受傷離場,要由張春暉入替。15分鐘香港飛馬有羅斯在禁區侵犯慕沙,球證判罰十二碼,基爾頓操刀射入,佳聯元朗初段已經領先1:0。19分鐘香港飛馬有一次反擊機會,佐佐木周接應隊友一個長傳但射門被陳嘉豪擋出,錯失扳平紀錄的機會。來到上半場補時階段,元朗再搏到十二碼,極刑再次由基爾頓射入,上半場已經領先香港飛馬2:0。

雖然有兩球領先優勢,但佳聯元朗下半場氣勢卻被香港飛馬蓋過。56分鐘,祖連奴主射罰球,陳嘉豪撲出不遠,佐佐木周想「執雞」但射斜。64分鐘胡晉銘傳中,艾華近門頂入,香港飛馬追近1:2。來到79分鐘,比賽正式進入高潮,陳肇麒接應艾華傳送破網,香港飛馬扳平2:2。但1分鐘之後,法比奧在禁區接應隊友二傳起腳破網,佳聯元朗再次領先3:2,並將比數帶到完場。

佳聯元朗主教練郭嘉諾賽後表現激動,今早由山東飛返港帶隊,在完場後又要趕到機場,飛回山東繼續考核亞洲足協專業級教練執照,親自回港就是為球迷而戰:「尾段知道球員很累,我就叫一班球迷大嗌『頂住』,最終順利入到決賽,希望可以一路贏落去,贏到菁英盃冠軍。」 明天(14日)將會上演另一場準決賽,由夢想FC和理文爭奪另一個決賽席位。

 

 

 

Comments