唔知大家有冇發覺,今時今日香港已經變得愈來愈唔對路,尤其是o岩o岩呢個禮拜,發生o左太多光怪陸離o既事,富足主身邊唔少朋友都灰過魁北克。真係要深思一下,到底係時代巨輪轉得太快,定係自己走得太慢,已經追唔上依家節奏。

先講o下記者呢一行吖,以前畀人話「鐵腳、馬眼、神仙肚」,呢個比喻已經過哂時。隨住網絡世界光速發展,報紙已經成為過時產物,唔少報館都大搞網上電視。行家們依家除o左要揸相機之外,仲要拎多部viewcam。富足主聽過有行家呻,有o的上司甚至講到出口,話依家拍片先係首要工作,反而見報o既稿呢,hea住寫就得喇。必要時甚至可以連相都唔使影,直接用片cap出o黎就ok喎。

更好笑o既就係,上司更要求下屬要好似大導演咁,拍片要有場面設計,最好可以話埋畀剪片同事知點樣剪接。總之要身兼寫稿、攝影、拍片於一身都不特止,仲要你錄埋vo先收得工,真係無得頂。富足主敢講,成個銀河系都冇一個地方o既記者可以做到咁,直頭可以申請入健力士。

至於香港球圈呢,有留意新聞都知,最近就真係醜聞多多,富足主唔想o係度多講喇,臨近截稿之前,就再爆多單奇聞,更加令人啼笑皆非。事緣足總紀律小組根據球證報告,決定對太陽飛馬國援鞠盈智一個「o殊」o既慶祝動作秋後算帳。球證報告指鞠盈智慶祝時挑釁敵對球迷,依例判停賽4場(其中2場可以以款代刑)。但係睇返全世界球壇,唔少球員咁做之後都唔會被追加停賽。足總呢次又創先河,唔知係咪就係鳳凰計畫呈現o既一種進步呢?

富足主
logo-dlm-small

Comments