拍檔



各位《體路》嘅讀者你地好,我係DBC數碼4台校園台逢星期六下午一點至三點《數碼體壇》嘅主持蘇雞呀,今次係我接左Angus(前任主持)棒之後,第一次係《體路》撰文同大家分享下平時做節目嘅大小事。

一到12月,莘莘學子就自不然要埋頭苦幹面對學校啲Project同考試,咁我同我拍檔Lulu當然唔例外啦。既要忙學校嘅工作,又要準備節目裡面將會討論到嘅資料,咁我地兩位小伙子會出現啲咩情況呢?

是咁的,有晚Lulu黎WhatsApp 我話我聽,佢已經連續通左三晚頂,唔係幾頂得順,托我幫下手準備埋佢果份嘅資料,我見佢咁慘情,又無理由唔幫下佢手。跟住到左第二日先知,原來佢果日一早係學校考試,考完即係撲返黎數碼港做節目。如果見過Lulu既廬山真面目都會知道(未見過唔緊要,下面有),佢係長期面青口唇白,隨時暈低咁嘅款,我見到佢果陣真係想Call定白車。

DBC-DEC-1

講返我同Lulu嘅認識都係源於《香港賽馬會青少年體育記者培訓計劃》,但係佢個人就比較低調,初期對佢印象唔深。直至呢個計劃既畢業禮,佢同我有幸擔綱典禮司儀嘅其中一員,先真正認識到Lulu,但因為負責工作部分唔同,一直都冇機會「正面交鋒」(合作)。之後前後腳入《體路》實習,不過都仍然鮮有合作機會,直至到數碼體壇呢個節目先有機會等我同Lulu係節目裡面「唇槍舌劍」。

又講返果日考完試面青口唇白既Lulu,Off Air 之後佢同我講話下次有機會幫我做返,我真係估唔到佢講嘅野咁快應驗。因為之後我就係因為啲私人事務離開左香港兩日,今次要靠返Lulu幫我預備返下集節目用嘅資料。今次我認真覺得Lulu係義氣仔女,事關返黎香港之後,我都係急急腳趕去數碼港做節目,冇乜時間準備節目要用嘅野。而佢就係節目開始前就一次過比哂要用嘅資料我,小弟真係感激流涕,多謝Lulu今次幫返我手。

DBC-DEC-2

用左咁大篇幅多謝Lulu之後,應該要講返下數碼體壇,DBC數碼電台最近更新左個直播App,內容同資訊多左好多,推介咁多位機不離手嘅朋友快啲安裝DBC數碼電台個手機App,記住每逢星期六下午一點至三點聽實DBC數碼4台校園台,有李德能、Lulu同蘇雞主持嘅《數碼體壇》。難得可以係廣播界爭得一片為體育發聲嘅土地,其實無論作為主持定聽眾,都應該珍惜體育運動係廣播平台嘅生存空間,所以鐘意體育嘅你,有乜理由唔留意住我地節目呢?

 

數碼體壇網上重溫:http://www.dbc.hk/tc/program.html?id=228

數碼體壇Facebook專頁:https://www.facebook.com/DigitalSportsNews?fref=ts

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap