體路專訪:陳慧琪 何智豪:「四人行 四倍快樂」(上集)



20130125-vicky13

歌仔都有得唱「兩個就夠曬數~」一首家計會廣告歌唱足30年,到今時今日社會一樣受用!不過,如果一次過「生曬」兩個,即使計算時間效益最化算,一向體能 fit 爆的香港滑浪風帆界夫婦陳慧琪(Vicky)及何智豪(阿豪),於去年底喜誕孖女後,經過個多月的「餵奶更」後都不禁高呼「攰爆」!但當兩位昔日「大細路」掛著兩雙黑眼圈、一左一右抱著愛女唱唱歌仔又一天時,就算雙倍「攰爆」,仍能感受到從此「四人行」的四倍快樂。

 Photo 2013-01-30 10.09.24 PM

▲何家兩位千金一動一靜。

未當上父母前,Vicky及阿豪一向予人「大細路」感覺,如今化身慈父慈母,照顧愛女卻有板有眼。不過兩夫妻依然不失攪笑本色,話說,故事由生女一刻開始,兩位「大細路」已在「搗亂」產房:

「當日BB早了一個月出世,半夜陣痛了4次才進產房,隔了3小時就生了,當時阿豪都有陪進產房,生的時候護士叫他幫我數1至10,點知佢數得勁慢,我完全唔知點用力好。」Vicky一邊講述生B過程,一邊笑笑口投訴身旁老公,阿豪卻淡定有錢剩地認真解釋:「其實佢真係比一般人『咇』個B『咇』得耐咗,但當時我數1至10時,我心入面感覺好像平日Train緊班小朋友運動員咁,1、2、3、4、5…哈哈。」

20130125-vicky02

 ▲提起生女經過,兩人大爆當日趣事。

之後,等過懷胎十月的過程,二人終於親眼看到兩位愛女出世,阿豪卻說:「當時都無咩特別感覺,都預左架嘛,但最攪笑係我抱BB比佢睇,同佢講呢個係你止痛藥時,佢一手推開個BB,搶番支笑氣(產房用鎮痛劑)。」「係佢拎咗我支笑氣,邊有人一手搶左人支笑氣?」Vicky忙著解釋之際,阿豪再強調:「但佢一手推開咗個女囉!」兩人你一句我一句,令筆者一直認為BB出世一刻很感動的幻想破滅,恍然大悟知道,原來生BB可以咁攪笑。

20130125-vicky24

▲兩公婆一人抱一個無時停。

以上內容雖然是真實對白,但Vicky及阿豪為人父母當然不會玩玩吓。據Vicky表示,大女何泳晴及細女何泳瑤自出世開始已經非常食得,個半月以來,兩夫婦最忙的事,莫過於輪流餵奶。「初初回家的時候,BB一日食9次奶,每2個半小時飲一次奶,每次飲一小時,即是我們每天就要餵18次奶,所以我不明白為什麼有些人生完BB後可以洗頭沖涼,因為我係完全無時間洗頭。」

Photo 2013-01-30 10.08.39 PM

▲妹妹泳瑤經常單眼偷笑。

為了照顧兩位千金,起初Vicky及阿豪自設「餵奶更」,阿豪放工後負責餵奶至凌晨3點,早更則交由Vicky負責,Vicky笑說生BB後最大得著是:「原來人係可以瞓咁少!」二人由以往每天瞓最少8小時,至現在每天僅睡2至3小時,不過隨BB漸漸長大,飲奶次數開始減少,近日兩位「大細路」終於可瞓番好覺。

20130125-vicky16

▲妹妹(右)聽到媽媽笑聲,都忍不住一齊笑起來,家姐(左)則在爸爸懷內睡得正甜。

眼見老婆每天辛苦湊BB,現任香港滑浪風帆青年軍教練的阿豪,雖然目前仍然每天要上班,但放工後都準時回家,甘願當上湊仔公。Vicky說:「佢而家變咗慈父喇,成日話我太大聲同啲女講嘢,雖然佢要番工又湊女都好辛苦,不過佢好鐘意換尿片同餵奶,仲學識單手拎兩個奶樽餵BB。」

 Photo 2013-01-30 10.09.08 PM

在旁的阿豪即時展示「單手餵奶」的絕密相片表演絕技,他更無奈笑稱經常被愛女欺負:「有次我換尿片,一打開塊片阿女即刻噴屎,仲要噴到我一手都係,噴完阿女仲自己偷笑,我和Vicky當時才知道,原來屎係可以噴得咁遠。」

20130125-vicky20

苦中作樂,大概是運動員的樂天本質。湊女雖辛苦,湊孖女再辛苦也好,Vicky及阿豪兩公婆從拍拖、結婚至今為人父母,攜手走過16年,訪問其間仍然如昔日般甜蜜大耍花槍,誰說「結婚是戀愛的墳墓、生小孩是戀愛的地獄」?

 

P.S. 請密切留意陳慧琪及何智豪專訪下集。

 

記者:徐飛、徐茄莉

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap