重新出發



2008年加入NBA嘅新人,今年唔經唔覺已經踏入佢地第六年球季,佢地當中有人成為聯盟嘅超級巨星、有人成為籃板王、有人打過總決賽、亦有人成為浪人球員……而佢地同樣面對同樣問題-重新出發!

20130913-drose05
(一)Derrick Rose﹣勇者回歸?

當年以狀元身份加入公牛隊嘅Derrick Rose,喺季後賽處男戰面對衛冕冠軍塞爾特人,以63.2%嘅命中率怒轟36分同交出11次助攻,幫助公牛以兩分打敗對手,震驚整個聯盟。就係呢一場波,令到Derrick Rose由一個聯盟小學雞,迅速成為被期待嘅未來巨星。

之後三年,Rose無意外地連續三年入選明星賽,更加喺2010/11球季奪得佢首個常規賽MVP,仲帶領公牛13年嚟首次殺入東岸決賽,成就非凡。

只可惜,隔一季喺首圈面對第八種子76人時,Rose喺垃圾時間中因為一球切入進攻,而令佢ACL撕裂,需要休養一季,令我好擔心,Rose會唔會步身型、打法相近嘅Steve Francis後塵,受傷後由一個明星球員變為二打六?

雖然熱身賽數據只可作參考,但Rose復出嘅兩場比賽,平均上陣21.5分鐘攻入13分+3助攻,甚至成功入樽,希望Rose唔好再受重傷,繼續保持高水平表現!

NBA球員Michael Beasley(圖片來源:thesportspost.com)
NBA球員Michael Beasley(圖片來源:thesportspost.com)

(二)Michael Beasley﹣洗心革面?

一個曾經嘅天才球員,因為紀律問題淪為一個問題少年,又因為吸毒而令狀態一直低沉,由一位未來之星變為一位普通正選球員,再由一位正選球員淪為後備仔,認真慘情。舊年Beasley轉會到鳳凰城,簽咗一份3年1,800萬美金嘅合約,以為佢有機會發圍,點知命中率低至四成,平均得分跌到10.1分,季後又被太陽狠狠地買斷合約。

機遇巧合下,Michael Beasley重投熱火懷抱,今次佢再唔係球隊倚賴嘅未來新星,正選地位已經無保證,但反而得到另一個重新出發嘅機會。現時熱火隊已經有LBJ、Wade去頂晒所有外界壓力,Michael Beasley只要做好本份,每場為熱火貢獻8至10分已經夠晒數。

希望Michael Beasley可以把握呢次最後機會洗心革面,將所有精力發洩喺球場上,為自己嘅未來打拼吧!

NBA球員O.J. Mayo(圖片來源:usatoday.com)
NBA球員O.J. Mayo(圖片來源:usatoday.com)

(三)OJ Mayo﹣浪人生涯無盡頭?

曾經被認為係下一個Kobe Bryant嘅OJ Mayo,因為出色嘅射波選擇,加上擅長利用不斷跑動製造空位入波,令佢頭兩年平均得分一直維持喺17分至18分左右。只可惜身高所限(6呎4吋),Mayo成球球隊防守上嘅漏洞,最後被防守專家Tony Allen搶走正選位置。

當同梯嘅Derrick Rose成為常規賽MVP、Kevin Love成為聯盟籃板王、Russell Westbrook殺入總決賽嘅時候,OJ Mayo卻已經由昔日嘅明日之星,淪為球隊忽視嘅第7、第8人,最後唯有轉戰簽下大量一年合約、進入過渡期嘅小馬隊。

上季OJ Mayo表現有所回升,交出一份15.3分+4.4次助攻+3.5球嘅成績表,只可惜球隊未能殺入季後賽,而季後OJ Mayo再一次成為浪人,以3年2400萬美金加入公鹿隊。

密爾沃基會成為OJ Mayo安家立業嘅地方嗎?定係OJ Mayo又一個中轉站?

NBA球員Kevin Love(圖片來源:rapgenius.com)
NBA球員Kevin Love(圖片來源:rapgenius.com)

(四)Kevin Love﹣紙板明星?
兩次入選明星賽、一座籃板王寶座、一張4年6,200萬美金嘅合同,再加上5年平均交出一份平均17.3分+12.2球籃板+1.9次助攻+35.2﹪3分球命中率嘅明星級數據,呢個人唔係聯盟超級巨星,就係紙板明星。

本來木狼得到西班牙天才控衛Ricky Rubio後,隊波好有機會打季後賽,點知Kevin Love因為一次用拳頭做掌上壓做到右手骨折(真係做掌上壓?定其他刺激活動?),最後成季打得18場比賽,最後木狼再次同季後賽擦肩而過。

以Kevin Love搶板嘅執著同能力,加上擅長將籃板轉化為入波嘅獨家技能,每年千五萬美金年薪絕不為過。但當做咗一哥後球隊未能殺入季後賽,加上球隊擁有一個星味更濃(重要靚仔)、更能帶動成隊波嘅Ricky Rubio,Kevin Love重有無留隊嘅必要?

大膽假設,如果Kevin Love今季仍然只係為自己數據而戰,木狼好大機會將佢換走,直接將球隊領導權交畀Ricky Rubio了。

每個人喺唔同時候,都會面對轉變呢個情況,但能唔能夠把握機會,除咗自身努力外,更視乎時勢風向。正如王維基先生準備充足,都可以因為「一男子因素」而得唔獲發牌,就知道有時候係時勢造英雄會比英雄做時勢更容易……

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap