【運動員網誌】首先要恭喜今年外流嘅運動員,希望大家響唔同嘅地方,都有出色嘅表現!而今年我好幸運,好榮幸成為第一位香港華人嘅欖球員登陸日本欖球職業聯賽!

我差唔多嚟咗日本兩個月,之前隨隊去咗北海道集訓營,休息咗一個星期之後,好好彩有機會上陣球隊季前嘅熱身賽,仲得到達陣!

介紹返先,今年我打嘅球隊係響日本職業聯賽最高組別(top league)嘅 NEC Green Rocket,我哋嘅訓練場地係響千葉縣我孫子市,大約距離東京45分鐘左右!

8月19號就係我哋新球季開始,響啱啱呢一個星期嘅訓練都比較辛苦,因為我哋第一場就會對住好有經驗嘅toshiba brave lupus!由於每個星期六都會比賽,每逢星期二總教練就會宣布邊23位球員被挑選作賽,另外冇被挑選嘅球員就會響星期日打練習賽!好榮幸我第一次踏足日本欖球界,我已經被挑選做後備!今次嘅選拔真係同被選入香港隊有過之而無不及,因為其他隊友都非常之有質素,希望今個星期嘅比賽會帶比我從來未有嘅經驗!

今個星期六我哋會去東京䄮父官運動場比賽,雖然呢個球場我一啲都唔陌生,因為之前代表隊都有響呢個球場比賽,但係今次我代表一個新嘅球會同一個新嘅聯賽作戰必定有另一番風味!雖然我唔知上陣時間會有幾多,但係我一定會好享受呢個第一次!

如果你哋路經日本嘅話,睇下會唔會有機會響欖球場見到你哋!

Print Friendly, PDF & Email

Comments