夏體硬與恆大納比的飯局



恆大
圖片來源: 廣州恆大足球俱樂部

自從呢個blog無再寫可樂暉後,收到好多人inbox我,不約而同話好懷念以前期期有膠派既日子,多謝你們,好滾動,其實我都想寫多d,但我都要聽副足主既指示。

我唔係斯文人,有時想起可樂暉,都會燥到掟keyboard;寫兩三個鐘之後,keyboard都掟爛幾個,因為無keyboard用所以寫唔到,寫唔到就即係出唔到(blog),谷埋谷埋,慘過去死。

尤其係每次睇波睇到d keeper甩手、彈琵琶,就會自動投射出可樂暉既身影,有時真係覺得,明明係銀河系萬千星輝叱吒球壇最受歡迎既體育記者足球隊,點解要留個膠人係度?

今日見到可樂暉post左張相出黎,話佢屋企窗外面有個屎塔咁Q大既蜂巢係度,聽聞仲要唔係普通蜜蜂,係針得死人老鏈咁大隻既唔知咩蜂,我承認我有一刻諗過可樂暉比d蜜蜂針到入廠得番半條人命然後話對唔住我要退隊…

講住咁多先,唔係副足主又有說話聽。

仲記唔記得我同副足主之前北上廣州視察廣州恆大嘛?呢支中超球會近期威水喇,兩回合大炒日職聯既柏雷素爾入亞冠盃決賽,有國內d報道話,恆大今屆大大話話洗左成億人仔先有咁既成績。

諗起果次,我地同恆大教練納比有個禮節性飯局,所謂飯局,是很認真的,因為球會高層會招呼貴賓在board room晚飯,在頂級球會之間,是一種禮儀;叫得做board room,當然有dress code,雖然我同副足主一向都朱克伯格咁款,形象衣著親民,但既然係貴賓,恆大方面都破例准話我地波衫短褲咁入席,十分impressive。

席間,納比問我地,夏體硬搞得咁成功,洗左幾多錢,我舉起三隻手指,「三千萬?」「No」「三百萬?」「No」「三十萬?」「No」「三萬…太少了吧」「Yes」「是英鎊嗎?」「不,是Yen」「三萬Yen可以做到d乜?」「的確做唔到d乜,不過我地連三萬Yen,都無」

納比呆了,佢問我地有無d好似穆里奇、孔卡等等既高質外援,我話當然有啦,佢問:咁你班波就算兄弟波,外援都要出糧架?我答,係既,而家球壇度度都講錢,不過都仲會有d球會窮到褲穿仲可以靠球會名氣甚至主席關係去R到d人返黎踢波,近既唔講啦,遠既你睇AC米蘭,面皮成尺厚。

飯後納比再三多謝我地意見,不過就話感情牌佢用唔到,因為佢都係初黎報到;尋晚睇完佢地場波,再睇番報道話佢地洗左成億,我一邊搖著手中果杯Dry Martini,一邊慨歎:「世界球壇無得救了」

國足主
logo-dlm-small

Share via
Copy link
Powered by Social Snap