體記勇奪「黎新祥盃」好友組冠軍



hartiend-130925

話咁快又到9月尾,即係新一季記協盃已經逐漸臨近。雖然賽會仍未公布開咧日子,但據估計賽期都係11月咁上下,夏體硬今次作為衛冕球隊,組軍工作肯定唔可以馬虎。

天下無不散之筵席,一支健康球隊,新陳代謝係必經程序。同國足主初步開過會,知道夏體硬今季人腳會有變動,但無論出現咩o野變動都好,大家都唔使太過意外。至於有傳可樂暉因為身體成日無故發燒,可能提早掛靴一事,本會要等獸醫報告出o左先會有正式公布。

我o地有唔少兄弟上星期代表體記出席o左「黎新祥盃」,過去2屆我o地多數都係捱打,記憶中仲好似一場都未贏過,但今屆就3戰全勝,贏o左好友組冠軍。最令人意外就係,第一場以7比6贏o左有山度士同陳樹明在陣o既銀禧67-68青年軍。至於之後富足主又有入波呢o的等閒事,就無謂多花篇幅喇。

連日來收到唔少球迷投訴,話我o地應該把握出席「黎新祥盃」o既機會,為夏體硬做多o的宣傳。我明白大家愛之深,責之切,怕我o地錯失一個宣傳的好時機。大家亦希望夏體硬可以好好宣傳未來o既記協比賽。大家的心意我完全明白,但大家請放心,我o地正在努力中。

當然我都明白如果借「黎新祥盃」時一齊宣傳,可能是極佳o既時機。但正如之前多次強調,今次絕大部份o既安排,都是大會同埋體記建議及負責。想做一o的額外o既宣傳工作去講夏體硬,都要佢o地同意,所以未必如大家想像般容易就做到。再加上大權在握o既國足主當日又玩潛水,徒具虛名o既富足主實在無能為力。

但係我o地依家已重新投入工作,去計劃宣傳11月o既記協盃。而正如之前所說,Nike將會為夏體硬準備另一個全新的「乜乜勁揪」計劃,向外面宣傳球隊同埋賽事。事實上,如果只靠球會自己努力,成效肯定有限。反而球會同贊助商一亦合作,就會相得益彰。

宣傳有Nike幫手,夏體硬的角色就是踢好自己的比賽。球隊聽日開始小休至星期一,之後就會拉隊到櫻桃街集訓,預計最少會進行3場賽事。當中不乏實力理想o既對手,相信到時會有最理想的狀態應戰。

富足主
logo-dlm-small

想了解更多第十四屆全國運動會香港隊資訊,請瀏覽www.lcsd.gov.hk/14NG
Share via
Copy link
Powered by Social Snap