「這制服!一穿上!」



圖片來源:流浪足球隊官方網頁
圖片來源:流浪足球隊官方網頁

上個星期港甲休戰,但係唔代表富足主o既工作會減少,皆因今季各支甲組隊都大搞Marketing,作為體記真係唔驚冇o野寫。

套用某圈中人o既思維,「Marketing呢o的o野你識乜」,無錯,港甲球隊一直就係唔識搞Marketing,以致無乜知名度,球員行出街就更加無人識,分分鐘連可樂暉都出名過佢o地。不過隨住下季要搞港職聯,好多球隊都「的」起心肝,好畀心機為球圈注入新思維。

首先要讚o既就梗係太陽飛馬啦,呢隊波由於有娛樂公司撐腰,加上好識得利用互聯網做推廣媒介,可以話搞到有聲有色。不過有留意本地波動向o既球迷,都認同近期最爆o既,就係標準流浪隻會歌。

首歌個名叫「打打氣」,曲詞編監由球會中人一手包辦,更搵o左班主莫耀強主唱。或者有人聽完隻歌之後,就笑莫生唱功唔掂,o的詞又老套,但問心,流浪呢次舉動,剩係份誠意已經爆哂燈。試問呢個世界上,有幾何真係會由老細出錢出力仲出埋自己把聲為球隊宣傳?

所以如果見到有人再恥笑mode on,我一定會恥笑返佢。o係香港投資搞波,本來已經唔係一件易事,何苦仲要彈三彈四呢?為o左幫手推動呢首「打打氣」,富足主已經落手改詞,遲o下再游說5+HIM、細暉、祺祺、同昌神開金口,組合名我都諗好,就叫「5細祺昌」,大家唔會唔支持o卦?

富足主
logo-dlm-small

image_pdf
image_print
Share via
Copy link
Powered by Social Snap