hdr

hdr

【體路專訊】作為運動員,最大嘅動力就係金牌;作為教練,一定想自己嘅運動員攞冠軍;作為家長,永遠都想子女是第一名。所以,體育精神強調的「友誼第一,比賽第二」的概念,並不像一般人講得如此簡單,事實係要經歷很多很多,去到某境界才能夠體會…就好似梁家輝係寒戰講過:「當你坐到我個位,你自然心裡有數!」

今次先同大家分享一個我細個係北京聽過嘅故事:中國運動員普遍由幾歲開始訓練,穿州過省,帶著數不盡的傷痛,每位健兒都希望可以代表國家隊出戰奧運!但可惜每個個人項目只能派出兩名運動員作賽,咁全國有咁多個項目嘅第三名可以做咩? 傳聞曾經有一位以一分之差未能入隊的『全國第三』體操運動員,最後去咗番禺長隆表演馬戲,月入¥4000;而佢兩位隊友就做左世界冠亞軍,全中國無人唔識,金銀牌運動員當然有名又有利…『全國第三』好可能係世界級比賽都名列前茅,不過現實又係點?睇到呢度除左心酸之外,感受到現實的殘酷未?

我哋喺香港做運動員,同世界級運動員相比,雖然大部分項目嘅成績一定係有分別,不過我哋嘅堅持同拼博精神,其實係應該要同世界級運動員睇齊!能力因人而異,即使平時去跑下步,做下GYM,減下肥都叫「做運動」,其實都應該有目標;如果稱得上係「運動員」,我個人認為必須要有「責任」,而且永遠不只是對自己負責,還有背後很多很多人的支持和犧牲!

如果你係仲未出嚟社會工作的運動員,我希望你會諗下點解喜愛玩運動?我玩呢項運動,高峰究竟可以去到邊?可以吃更多的苦,虛心向身邊唔同的人學習、溝通,定下目標,不斷的堅持力爭上游,從而令自己在過程中豐富人生經歷,其實對日後喺社會或者職場上都事半功倍!特別想提醒一些年少氣盛的體壇「明星」,人外有人,天外有天,永遠都有人叻過自己,唔好「吔文吔武」,學會低調!

「讚賞」係出自人哋把口,「認叻」係因為自己唔夠料先要做嘅行為,共勉之!

出咗嚟社會做野,但依然可以繼續做「業餘」運動員的朋友,你們開始感受到世途險惡,需要平衡生活嘅同時從運動中搵返自己(特別喺團體運動後嘅飯局)!呢個階段係會幾辛苦…不過都係嗰句: 堅持投入去做,努力不懈的「搏老命」,身體、時間、家庭等等…終有一日會話你聽幾時要停喇…

唔好成日諗住「當年我…(下刪1000字),今時今日阿叔/阿姐有咩唔得呀?」呢個唔係能力問題,而係值唔值得的問題,三思而後行!!

「打而優則教」係大部份退役運動員會做的事,雖然為口奔馳,不過都要堅持薪火相傳!或者而家係一個捉POKEMON仲勤力過返學嘅年代,班細路一對鞋嘅價值等於我哋當年10對,好似個個都好忙但就係唔知忙咩,長期對住空氣同雲教波…

不過老鬼們一定要堅持去教,否則運動項目就會沒落,有一日連自己的興趣都無埋,呢個世界就好灰架喇…我相信好多退役運動員一定會俾自己嘅子女玩運動,因為運動對身心發展的確係好,因為只有教育,下一代才會更好!但願有更多教練出現….

運動員的RULE NUMER ONE:堅持,堅持,再堅持!!!

Comments