香港手球運動員湛永基網誌:無敵的教練



IMG-20160229-WA0043

「湛sir」這個稱呼由上年8月出現,開始嘅時候由幾個細路選拔開始叫,到組軍16人的青年隊,叫左10個月加埋而家多咗幾個新人,全世界有30人會咁叫我。開始時,這稱呼比別人對我的其他稱呼壓力大得多,教不好,練不好別人的孩子怎麼辦呢?

過了一段時間,發覺不是我們教練團能付出多少的問題,而是究竟他們想學多少才是重要!回想自己做球員時,我都會缺席唔練波,唔知係咪報應,而家到我做教練的時候,問題比當年更為嚴重!

好多功課要處理,好多工作要去做,但一星期只要三小時的恆常練習都安排不了,我也不太理解!我一向唔喜歡「逼」,勉強無幸福,何必呢?讀緊書嘅學生應該唔會夠一個要工作,有家庭,有小孩,還有一連串壓力嘅教練或者老師忙同攰。大家會話教練或者Miss 阿Sir有出糧架(當中也有義務的),不過如果有班無心或者好自以為是嘅學生,份糧真係睇醫生都未夠…

我哋希望透過手球可以培養到一班品性或者紀律較好的青年,吃得苦,懂得溝通包容的人,在社會上一定有優勢。但如果連基本責任心都無,到大個要出黎社會做事,要成家立室,咁點算呢?事在人為,無嘢做唔到,問題係點樣做到,講到尾都係心態!

當然,同其他師兄弟傾開計,發覺「繁忙兒童」比比皆是!教練也是人,鼓勵好,責罵最唔好,會否惡性循環都要看其功力!好彩我都仲有幾個有心的球員,都算安慰,否則真係番薯點豉油–心淡!(早兩日跟老爸傾計學嘅!)

換另一個角度睇,手球無職業聯賽,在香港當一個全職手球教練,實在喺搵食艱難!所以手球教練都係學校老師或者Part time為主,我想喺度多謝一班熱愛手球的兄弟姊妹,不斷為香港手球付出!辛苦了!

有時對住一班恨鐵不成鋼的細路,實在無限理由放棄,雖然每位教練的教法可能不同,不過希望大家繼續努力,繼續留住心入面嘅熱情和那團火,令香港手球發展得更蓬勃!未做教練之前覺得好易,針唔吉到肉唔知痛,現在又學懂了!

後記:幾星期前嘅一個星期日去彩虹道打籃球,見到手球場有比賽,從隊友口中得知教練係一名中學老師…一至五要教書又練波,星期六帶學界,星期日聯賽,他的生活,家庭,時間是怎安排呢?一字記之曰:「心」

最近幾次練習打練習賽,因為人數問題而我都要落場打,我發覺都仲幾Fit!

作為教練,「無敵是最寂寞,最是痛苦!」

Share via
Copy link
Powered by Social Snap