【韓國直擊】造訪肥宏韓國訓練基地



basketball_chowkinwan20160418_29

【體路專欄】南華籃球隊上星期於銀牌決賽,憑著隊長惠龍兒及羅意庭合轟50分下,成功擊倒永倫衛冕。但短暫歡呼過後,南華球員又要再次「歸位」,繼續為甲一聯賽再搏過。然而,搏命嘅除咗有香港嘅南華球員外,各位又記唔記得佢哋仲有一位正身處韓國、追尋緊職業籃球夢嘅香港球員呢?冇錯,佢係周健宏,人稱「肥宏」,正為10月嘅KBL選秀而努力。為咗讓讀者了解下「肥宏」嘅最新狀況,今次小記決定遠赴韓國,去探訪呢位追夢港男。

20151026-08chowkinwan

chowkinwan_basketball_151107_1

開始之前,小記就先交待下點解「肥宏」會喺韓國先。「肥宏」其實已經喺韓國讀書四年,佢上年更曾經參加過當地職業籃球聯賽KBL選拔,雖然當日做出「雙雙」,但可惜最後都未獲當地職業隊垂青。縱然充滿遺憾,不過正所謂「邊度跌低邊度起翻身」,「肥宏」決定再比一次機會自己,在韓國再留一年,為韓職夢再搏過。

basketball_chowkinwan20160418_00

好,出發!「肥宏」就讀嘅明知大學其實孕育過唔少super star,例如有前曼聯球星朴智星、女子組合Sistar嘅寶拉、仲有近期紅到發紫嘅韓星朴寶劍,都係明知學生。至於「肥宏」就讀嘅運動部位於京畿道龍仁市,離首爾市中心都有差不多一小時車程,所以「肥宏」亦一盡地主之誼,專程由宿舍坐巴士出江南請小記先食午餐,再一齊坐巴士翻學校。

basketball_chowkinwan20160418_21
午餐係辣牛骨湯,唔好以為肥宏係「半韓仔」就好食得辣,食呢個辣湯其實都攪到佢出晒汗

話咁快,經過大約1小時車程,終於去到明知。其實原本想拍攝一下「肥宏」平時訓練有幾癲,但原來今日咁啱撞正明知要同一間高中打友誼賽,所以佢哋暫時都唔洗操。不過都好,小記可以趁機會觀摩下當地嘅籃球水平。

落車後落大雨,所以唯有google番個校園區比大家睇
落車後落大雨,所以唯有google番個校園區比大家睇

步入體育館一刻,其實已經睇到「嘩嘩聲」,因為區區一間大學嘅體育館就已經有兩個修頓室內場咁大。「肥宏」話呢個體育館係當年為奧運而興建,但比起首爾某些名牌大學已經唔算大。雖然舊就舊啲,但係設施就相當齊全,最特別係佢連觀眾席上面都有健身器材,唔怪知個個球員都練到咁大隻。

basketball_chowkinwan20160418_05
小記目測應坐到三至四千人
basketball_chowkinwan20160418_06
場內四周都有健身儀器
basketball_chowkinwan20160418_02
場館內有掛住唔同球員嘅旗織,大家搵唔搵到肥宏?

之後我跟「肥宏」入去場館內嘅會議室,原來每逢賽前或賽後教練都會於入面講解戰術。仲有唔講唔知,原來韓國人係相當重視輩分,所以球員對教練都會好恭敬,至於一年級生見到師兄除咗要鞠躬問好外,打掃、斟茶遞水呢啲都係基本嘢,肥宏話自己當年都熬過,但呢啲情況我諗喺香港都真係幾難見到。

basketball_chowkinwan20160418_22
已經Year4嘅肥宏係隊中老大哥,除咗有專屬位置,一班新生每次見到佢都會「45度」鞠躬。

友誼賽開始前,「肥宏」話先帶我去見下佢教練金南杞。之前都知韓國嘅籃球教練出曬名「嚴」,有時體罰呢家嘢就不在話下,「肥宏」更笑指曾經試過做錯事比教練一塊戰術板「兜巴車」,所以攪到小記當場都有啲擔心。話咁快教練就到咗,我即刻運用僅有嘅韓文知識先講句「阿你呀say喲」,未知金教練係咪見我遠道而來,所以都好有禮貌地同我打招呼,仲叫我隨便慢慢影㖭。

basketball_chowkinwan20160418_07
教練每次講嘢球員都一定要打醒十二分精神

basketball_chowkinwan20160418_24

basketball_chowkinwan20160418_30

稍稍熱身後,友誼賽亦都開始。近年喺香港都冇咩機會見到「肥宏」打波,雖然只係一場friendly,但都睇得出「肥宏」搏曬老命,絕無hea打。至於技術上亦進步好多,尤其身體對抗性方面,完全睇到當年佢在香港時嘅分野。令人意外唔單止有肥宏嘅進步,仲有對方高中生隊嘅表現。可能大家會以為高中生同大學生冇得打,但如果咁諗就大錯特錯,因為原來韓國高中籃球真係好高水平!講嘅唔止進攻上,而係防守上!講真場波真係幾悶,但原因唔係佢哋打得差,相反係佢哋每一球都守得好好,基本上唔會見到「走甩人」嘅情況出現,雙方都難以起手下所以先攪到冇咩波入。「進攻贏觀眾,防守贏冠軍」,就係咁解。

basketball_chowkinwan20160418_27
高中隊(白衫)防守對位做到足
basketball_chowkinwan20160418_28
賽後亦好有禮貌同教練講多謝,而在近年香港學界其實亦慢慢出現呢個習慣

見識完韓國高中籃球水平後,終於可以參觀下「肥宏」平時嘅生活地方。大學生活,仲要韓國,仲唔係多姿多彩?其實去之前小編都係咁諗,但現實與幻想,往往都係會有出入。頭先講咗,其實明知位於市郊,學校附近除左有幾間食肆外,就只得一間coffeshop,所以話五光十色嘅大學生活,只係適用於部分留學生。

basketball_chowkinwan20160418_19
肥宏宿舍,其實遠睇都有啲陰森
basketball_chowkinwan20160418_09
宿舍飯堂
basketball_chowkinwan20160418_10
當日晚餐係辣炒鴨肉,味道其實幾好,不過你會留意到又係冇菜。要均衡飲食,所以肥宏話平時出開市區都會買大量沙律菜。

至於呢個宿舍裏面只有運動部同學會住,雖然舊但勝在五臟俱全,飯堂、澡堂、休息室基本設施都有,另外仲有專嘅的物理治療師喺度,令運動員可以安心訓練。不過講到尾,唔洗諗呢度嘅學生會有咩娛樂,呢度個個只會為自己嘅運動職業夢進發,就好似肥宏話平時除咗練波讀書之外,就係練波讀書。艱辛過後,喺呢個宿舍到瞓教已經係佢最大娛樂。

basketball_chowkinwan20160418_15
課室與一般課室一樣
basketball_chowkinwan20160418_17
唔好睇少呢張乒乓波枱,係眼見宿舍內唯一嘅康樂設施
basketball_chowkinwan20160418_18
物理治療室
basketball_chowkinwan20160418_13
肥宏房間,唔好以為有高床軟枕瞓

 

basketball_chowkinwan20160418_14
呢幅相亮點其實係個衣櫃,右邊係肥宏的,左邊係同房師弟,充分表現出佢哋嘅輩分。

今季KBL選秀將會在10月展開,「肥宏」就話今個暑假要專心備戰同養傷,所以都唔會翻香港幫南華坐陣,所以咁多位球迷幫南華打氣時,記得要繼續支持喺韓國嘅「肥宏」喇!

 

後記:

basketball_chowkinwan20160418_01

總結今次旅程,可以話大開眼界,當中有幾方面係令小記都覺得幾讚嘆。第一樣係韓國呢種尊師重道、同講求輩分關係。正所謂「一生為師,終生為師」,呢樣野確係值得香港嘅同學及球員們借鏡(當然唔包括體罰啦)。第二樣係當地學生們對籃球嘅付出,為咗自己夢想,佢哋真係除咗練波,就係練波。好深刻當日友誼賽後,就係因為一球防守做得不好,大家晚飯都冇食,只係在球場內默默加操,見到咁嘅情況,小記即刻諗起學生時代練波嘅日子,而家先發覺原來當年自以為辛苦,其實只係他人嘅九牛一毛。

basketball_chowkinwan20160418_16
因為少少錯誤,大家飯都唔食,繼續練

最後,亦都係最重要,就係「肥宏」嘅毅力。坦白說以佢實力,在香港籃壇並不愁立足之地,即使唔打籃球,25歲嘅黃金之齡於香港仲有好多事可做。但正因為「夢想」兩字,結果佢選擇一個人去韓國「受苦」,就算上年跌低過今年都堅持要再試一次,單係呢份毅力已值得小編致敬。

420679_10150593300221650_1088134337_n

basketball_chowkinwan_120160418_03
冬天零下幾度跑沙灘係平常事,就算隻腳傷晒都只能頂硬上

其實小編係有問過Coach Kim,究竟「肥宏」同KBL仲有幾遠,當時佢就話:「其實混血兒在KBL有點輸蝕,因為過往有太多失敗例子關於引入混血或是歐藉球員。至於『肥宏』嘅身體質素其實很好,但在評審眼中表現可能只有6分,因為佢籃板和防守未做到最好,我希望佢今年可慢慢進步,因現時很多球隊需要嘅,正是呢類實幹型球員。」

basketball_chowkinwan20160418_20
肥宏今年會孖埋隊長金孝淳一齊再戰KBL選秀

雖然如教練所講,混血兒或會有秉輸蝕,但係「肥宏」就講明唔會放棄,會於今季繼續鍛練好:「我要做一個大家非選不可嘅球員!」失敗?So What!努力啊,「肥宏」!

basketball_chowkinwan_120160418_01
28號,對肥宏黎講係一個提醒。他指自己去年正是著28號波衫落選,所以今年唔會再重蹈覆轍

圖、文:蘇子傑(部分相片由受訪者提供)

Share via
Copy link
Powered by Social Snap